ദോഹ: ഖത്തറിൽ സൈക്കിളുകൾ, ഇ-സ്കൂട്ടറുകൾ ഉൾപ്പെടെയുള്ള ചെറുകിട യാത്രാ സംവിധാനങ്ങൾ (Micromobility) ഉപയോഗിക്കുന്നവർക്കായി സുരക്ഷിതവും അത്യാധുനികവുമായ സൗകര്യങ്ങളോടെയുള്ള പുതുക്കിയ ‘ഖത്തർ ബൈസിക്കിൾ മാസ്റ്റർ പ്ലാൻ’ ഗതാഗത മന്ത്രാലയം (MoT) പുറത്തിറക്കി. നിലവിലുള്ള ഗതാഗത ആവശ്യങ്ങളും ഭാവിയിലെ നഗര വളർച്ചയും കണക്കിലെടുത്ത് സുരക്ഷ ഉറപ്പാക്കാനും ഹരിത സൌഹൃദ ഗതാഗതം പ്രോത്സാഹിപ്പിക്കാനുമാണ് പുതിയ പദ്ധതി ലക്ഷ്യമിടുന്നത്. ഔദ്യോഗിക വാർത്താ ഏജൻസിയായ ക്യുഎൻഎ (QNA) ആണ് മന്ത്രാലയത്തിൻ്റെ ഈ പ്രധാന പ്രഖ്യാപനം റിപ്പോർട്ട് ചെയ്തത്.
രാജ്യത്ത് നിലവിലുള്ള 1,500 കിലോമീറ്ററിലധികം വരുന്ന സൈക്കിൾ പാതകളെക്കുറിച്ച് കൃത്യമായ പഠനം നടത്തിയ ശേഷമാണ് പുതിയ മാസ്റ്റർ പ്ലാനിന് രൂപം നൽകിയത്. ഇതിനായി അയ്യായിരത്തിലധികം ആളുകളിൽ നിന്ന് നേരിട്ട് വിവരശേഖരണം നടത്തുകയും നൂറ്റി ഇരുപതോളം സാങ്കേതിക യോഗങ്ങൾ ചേരുകയും ചെയ്തിരുന്നു. നിലവിൽ ഖത്തറിലെ ജനസംഖ്യയിൽ 19 ശതമാനം ആളുകളുടെ പക്കൽ സൈക്കിളുകളോ ഇ-സ്കൂട്ടറുകളോ ഉണ്ടെങ്കിലും, ദൈനംദിന യാത്രകൾക്കായി ഇവ ഉപയോഗിക്കുന്നത് ഒരു ശതമാനത്തിൽ താഴെ മാത്രമാണെന്ന് പഠനത്തിൽ കണ്ടെത്തിയിട്ടുണ്ട്. ഈ സാഹചര്യം മാറ്റിയെടുക്കാനാണ് പുതിയ പദ്ധതി ഊന്നൽ നൽകുന്നത്.
പുതുക്കിയ പദ്ധതി പ്രകാരം രാജ്യത്ത് 3,800 കിലോമീറ്ററിലധികം പുതിയ സൈക്കിൾ പാതകൾ നിർമ്മിക്കും. പ്രധാന റോഡുകളിലെ സിഗ്നലുകളിലും ജംഗ്ഷനുകളിലും തടസ്സമില്ലാതെ യാത്ര ചെയ്യാൻ 110 കിലോമീറ്ററിലധികം ദൈർഘ്യമുള്ള പ്രത്യേക മേൽപ്പാലങ്ങളും അടിപ്പാതകളും (Grade-separated crossings) ഇതിൻ്റെ ഭാഗമായി വരും. കൂടാതെ ഇ-സ്കൂട്ടർ, സൈക്കിൾ യാത്രക്കാർക്കായി ചാർജിങ് പോയിൻ്റുകളും വിശ്രമ കേന്ദ്രങ്ങളും അടങ്ങിയ 7 മെഗാ അമിനിറ്റി ഹബ്ബുകളും സ്ഥാപിക്കും. ഇതിനുപുറമെ യാത്രക്കാരുടെ സുരക്ഷയ്ക്കായി 17 പുതിയ നയങ്ങളും 348 അനുബന്ധ നിർദേശങ്ങളും മന്ത്രാലയം മുന്നോട്ടുവെച്ചിട്ടുണ്ട്.
ഗതാഗത മന്ത്രാലയത്തിൻ്റെ പുതിയ നീക്കം ഖത്തറിലെ വലിയൊരു വിഭാഗം വരുന്ന ഇന്ത്യൻ പ്രവാസികൾക്ക് ഏറെ പ്രയോജനപ്പെടും. പ്രത്യേകിച്ച് ഡെലിവറി ജീവനക്കാർക്കും മെട്രോ സ്റ്റേഷനുകളെ ആശ്രയിച്ച് ഹ്രസ്വദൂര യാത്രകൾ നടത്തുന്നവർക്കും സുരക്ഷിതമായ പ്രത്യേക ട്രാക്കുകൾ ലഭിക്കുന്നത് റോഡപകടങ്ങൾ വലിയ തോതിൽ കുറയ്ക്കാൻ സഹായിക്കും. മെട്രോ സ്റ്റേഷനുകളിലേക്ക് സൈക്കിൾ പാതകൾ കൂടുതൽ ബന്ധിപ്പിക്കുന്നതോടെ വ്യക്തിഗത വാഹനങ്ങളെ ആശ്രയിക്കുന്നത് കുറയ്ക്കാനും സാധിക്കും. ഘട്ടംഘട്ടമായാണ് ഈ പദ്ധതി രാജ്യത്ത് നടപ്പിലാക്കുക.
Leave a Comment