കുവൈറ്റ് സിറ്റി: ഇറാൻ-യുഎസ് യുദ്ധ പശ്ചാത്തലത്തിൽ പശ്ചിമേഷ്യൻ വ്യോമയാന മേഖല കടുത്ത പ്രതിസന്ധിയിലൂടെയും റൂട്ട് മാറ്റങ്ങളിലൂടെയും കടന്നുപോകുമ്പോൾ, പ്രതിരോധത്തിന്റെ മാതൃകയായി മാറുകയാണ് കുവൈറ്റ് അന്താരാഷ്ട്ര വിമാനത്താവളം. അടുത്തിടെയുണ്ടായ ഡ്രോൺ ആക്രമണങ്ങളിൽ തകർന്ന അടിസ്ഥാന സൗകര്യങ്ങൾ യുദ്ധകാലാടിസ്ഥാനത്തിൽ പുനർനിർമിച്ച്, ജൂൺ ഒന്നിന് ടെർമിനൽ 1 (T1) വീണ്ടും തുറക്കാനുള്ള കുവൈറ്റിന്റെ തീരുമാനം ആഗോള ഏവിയേഷൻ രംഗത്ത് വലിയ ചർച്ചയായിട്ടുണ്ട്. വ്യോമപാതകളിൽ ഏർപ്പെടുത്തിയ നിയന്ത്രണങ്ങളും യുദ്ധഭീതിയും കാരണം വിമാന സർവീസുകൾ വെട്ടിച്ചുരുക്കാൻ ആഗോള കമ്പനികൾ നിർബന്ധിതരാകുന്ന സാഹചര്യത്തിലാണ് കുവൈറ്റ് ഈ ധീരമായ ചുവടുവെപ്പ് നടത്തുന്നത്.

യുദ്ധം മൂലം പശ്ചിമേഷ്യയിലെ ഇന്ധനവിലയിലുണ്ടായ 120 ശതമാനത്തിലധികം വർദ്ധനവും ഇൻഷുറൻസ് തുകയിലുണ്ടായ കുതിച്ചുചാട്ടവും എയർലൈൻ കമ്പനികളുടെ സാമ്പത്തിക അടിത്തറ ഇളക്കിയിരിക്കുകയാണ്. സുരക്ഷിതമായ മറ്റ് വ്യോമപാതകൾ (Rerouting) തേടി നീണ്ട ദൂരം സഞ്ചരിക്കേണ്ടി വരുന്നത് വിമാനങ്ങളുടെ സർവീസ് സമയത്തെയും ചെലവുകളെയും സങ്കീർണ്ണമാക്കി. ഭൂരിഭാഗം വിദേശ വിമാനക്കമ്പനികളും കുവൈറ്റിലേക്കുള്ള സർവീസുകൾ താൽക്കാലികമായി നിർത്തിവെച്ചിരിക്കുകയോ വെട്ടിച്ചുരുക്കുകയോ ചെയ്തിരിക്കുകയാണ്. ഇന്ത്യയിലെ മുൻനിര കമ്പനികളായ എയർ ഇന്ത്യയും ഇൻഡിഗോയും പ്രതിസന്ധിയെ തുടർന്ന് സർവീസുകൾ റദ്ദാക്കുകയോ ഇന്ധന സർചാർജ് വർദ്ധിപ്പിക്കുകയോ ചെയ്തിട്ടുണ്ട്.

ഈ വ്യോമയാന അരാജകത്വത്തിനിടയിലും തങ്ങളുടെ ദേശീയ വിമാനക്കമ്പനിയായ കുവൈറ്റ് എയർവേയ്‌സിന്റെ സർവീസുകൾ 17-ൽ നിന്ന് 29 റൂട്ടുകളിലേക്ക് വ്യാപിപ്പിച്ച് കുവൈറ്റ് വിപണിയിൽ ആത്മവിശ്വാസം നിലനിർത്തുന്നു. ജൂൺ മാസത്തോടെ ആഴ്ചയിൽ 728 സർവീസുകൾ നടത്താനാണ് കമ്പനിയുടെ തീരുമാനം. വേനലവധിക്ക് നാട്ടിലേക്ക് മടങ്ങാൻ യുദ്ധം കാരണം ടിക്കറ്റ് കിട്ടാതെ വലയുന്ന പതിനായിരക്കണക്കിന് പ്രവാസി മലയാളികൾക്ക് കുവൈറ്റിന്റെ ഈ വ്യോമയാന തിരിച്ചുവരവും സർവീസ് വർദ്ധനവും വലിയ തോതിൽ തുണയാകും.