ഖത്തറിൽ പഠനത്തിനൊപ്പം സർക്കാർ ജോലിയും ഉറപ്പ്; ‘ഡിജിറ്റൽ ട്രാൻസ്ഫോർമേഷൻ സ്കോളർഷിപ്പ്’ പ്രഖ്യാപിച്ചു

ദോഹ: ഖത്തറിൽ ഉന്നത വിദ്യാഭ്യാസത്തിനൊപ്പം മികച്ച സർക്കാർ ജോലിയും ഉറപ്പാക്കുന്ന പുതിയ സ്കോളർഷിപ്പ് പദ്ധതി പ്രഖ്യാപിച്ചു.

2026-2027 അധ്യയന വർഷത്തേക്കുള്ള ‘ഡിജിറ്റൽ ട്രാൻസ്ഫോർമേഷൻ പ്രോഗ്രാം’ (Digital Transformation Programme) എന്ന ഈ പദ്ധതി രാജ്യത്തെ സാങ്കേതിക മേഖലയ്ക്ക് വലിയ മുന്നേറ്റം നൽകും.

വിദ്യാഭ്യാസ, ഉന്നത വിദ്യാഭ്യാസ മന്ത്രാലയം, വാർത്താവിനിമയ-സാങ്കേതികവിദ്യാ മന്ത്രാലയം , സിവിൽ സർവീസ് ആൻഡ് ഗവൺമെൻ്റ് ഡെവലപ്മെൻ്റ് ബ്യൂറോ എന്നിവ സംയുക്തമായാണ് പദ്ധതി നടപ്പിലാക്കുന്നത്.

പഠനം പൂർത്തിയാക്കുന്ന വിദ്യാർത്ഥികൾക്ക് നേരിട്ട് സർക്കാർ ജോലി ലഭിക്കുന്ന ‘scholarship ending with employment’ എന്നതാണ് ഈ പദ്ധതിയുടെ ഏറ്റവും വലിയ ആകർഷണം.

പദ്ധതിയുടെ ഭാഗമായി വിദേശത്തെ മികച്ച സർവകലാശാലകളിൽ ഉന്നത പഠനം നടത്തുന്ന വിദ്യാർത്ഥികൾക്ക് പ്രതിമാസം പരമാവധി 20,000 ഖത്തർ റിയാൽ വരെ സ്റ്റൈപൻഡ് ലഭിക്കും.

ഇതിന് പുറമെ വാർഷിക ബിസിനസ് ക്ലാസ് യാത്രാ ടിക്കറ്റുകൾ, യാത്രയ്ക്ക് മുൻപുള്ള പ്രത്യേക അലവൻസുകൾ , മികച്ച പഠന നിലവാരം പുലർത്തുന്നവർക്കുള്ള അക്കാദമിക് എക്സലൻസ് റിവാർഡുകൾ എന്നിവയും ലഭ്യമാക്കും.

എൻജിനീയറിങ്, സയൻസ്, ടെക്നോളജി ട്രാക്കുകളിൽ പഠിക്കുന്ന വിദ്യാർത്ഥികൾക്ക് മാസം 14,000 ഖത്തർ റിയാൽ വരെയാണ് സാമ്പത്തിക സഹായം ലഭിക്കുക.

ഇവർക്കും പഠനശേഷം പൂർണ്ണമായും തൊഴിൽ ഉറപ്പുനൽകുന്നുണ്ട്. വിദേശ രാജ്യങ്ങളിൽ പഠിക്കുന്നവർക്ക് മാത്രമല്ല, ഖത്തറിലെ എഡ്യൂക്കേഷൻ സിറ്റി ഉൾപ്പെടെയുള്ള അംഗീകൃത സ്ഥാപനങ്ങളിൽ പഠിക്കുന്നവർക്കും ഈ ആഭ്യന്തര സ്കോളർഷിപ്പിന്റെ ആനുകൂല്യം ലഭിക്കുന്നതാണ്.

നിർമ്മിത ബുദ്ധി (AI), സൈബർ സുരക്ഷ , ഡിജിറ്റൽ അനലിറ്റിക്സ് , ക്ലൗഡ് കമ്പ്യൂട്ടിങ് തുടങ്ങിയ ആധുനിക സാങ്കേതിക മേഖലകൾക്കാണ് സ്കോളർഷിപ്പിൽ പ്രധാന മുൻഗണന.

ഖത്തറിലെ ടെക് മേഖലയിൽ ജോലി ചെയ്യുന്ന ഇന്ത്യൻ പ്രൊഫഷണലുകൾ ഉൾപ്പെടെയുള്ള പ്രവാസികൾക്കും ഈ പദ്ധതിയുടെ ഭാഗമായി പുതിയ സാധ്യതകൾ തുറന്നുകിട്ടും.

സർക്കാർ മേഖലയിൽ കൂടുതൽ സ്വദേശിവൽക്കരണം നടക്കുമെങ്കിലും, ഇതിൻ്റെ ഭാഗമായുള്ള പരിശീലനം (training), മെൻ്ററിങ്, ടെക്നോളജി പാർട്ണർഷിപ്പുകൾ, സ്വകാര്യ മേഖലയിലെ മറ്റ് പ്രൊജക്റ്റുകൾ എന്നിവ വിദേശ പ്രൊഫഷണലുകൾക്ക് കൂടുതൽ അവസരങ്ങളൊരുക്കും.