ഷാർജയിൽ നിന്നെത്തിയ പാക് ചരക്കുവിമാനം അറേബ്യൻ കടലിൽ തകർന്നുവീണതായി സംശയം; അഞ്ച് ജീവനക്കാരെ കാണാതായി, വൻ തിരച്ചിൽ

കറാച്ചി/ഷാർജ: യുഎഇയിലെ ഷാർജയിൽ നിന്നും പാകിസ്ഥാനിലെ കറാച്ചിയിലേക്ക് സർവീസ് നടത്തുകയായിരുന്ന ചരക്കുവിമാനം അറേബ്യൻ കടലിന് മുകളിൽ വെച്ച് കാണാതായി.

പാകിസ്ഥാൻ ആസ്ഥാനമായുള്ള കെ2 എയർവേയ്‌സിൻ്റെ (K2 Airways) ബോയിങ് 737-400 കാർഗോ വിമാനമാണ് ചൊവ്വാഴ്ച രാത്രിയോടെ അപകടത്തിൽപ്പെട്ടത്.

ഷാർജയിൽ നിന്നും പുറപ്പെട്ട വിമാനവുമായുള്ള റഡാർ, റേഡിയോ ബന്ധങ്ങൾ എയർ ട്രാഫിക് കൺട്രോളിന് പൂർണ്ണമായും നഷ്ടപ്പെടുകയായിരുന്നു.

അഞ്ച് ജീവനക്കാരാണ് അപകടസമയത്ത് വിമാനത്തിൽ ഉണ്ടായിരുന്നത്. വിമാനം അറേബ്യൻ കടലിൽ തകർന്നുവീണതാകാമെന്ന നിഗമനത്തിലാണ് പാക് വ്യോമയാന അധികൃതരും നാവികസേനയും. വിമാനത്തിനായി കടലിൽ വിപുലമായ തിരച്ചിലാണ് ഇപ്പോൾ പുരോഗമിക്കുന്നത്.

പാകിസ്ഥാൻ സമയം രാത്രി 9.18-ഓടെ വിമാനത്തിന്റെ പ്രധാന നാവിഗേഷൻ സംവിധാനത്തിൽ സാങ്കേതിക തകരാർ സംഭവിച്ചതായി പൈലറ്റുമാർ കറാച്ചി ഏരിയ കൺട്രോൾ സെൻ്ററിനെ (ACC) അടിയന്തരമായി അറിയിച്ചിരുന്നു.

ഇതിന് പിന്നാലെ എയർ ട്രാഫിക് കൺട്രോളർമാർ പൈലറ്റുമാർക്ക് ആവശ്യമായ സുരക്ഷാ മാർഗനിർദേശങ്ങൾ നൽകി. എന്നാൽ കേവലം മൂന്ന് മിനിറ്റുകൾക്കുള്ളിൽ, കൃത്യമായി പറഞ്ഞാൽ 9.21-ന്, വിമാനവുമായുള്ള ആശയവിനിമയം പൂർണ്ണമായി വിച്ഛേദിക്കപ്പെട്ടു.

കറാച്ചി തീരത്ത് നിന്നും ഏകദേശം 155 നോട്ടിക്കൽ മൈൽ (ഏകദേശം 287 കിലോമീറ്റർ) പടിഞ്ഞാറ് മാറിയാണ് റഡാറിൽ നിന്നും വിമാനം അപ്രത്യക്ഷമായത്.

പ്രമുഖ ഫ്ലൈറ്റ് നിരീക്ഷണ വെബ്‌സൈറ്റായ ഫ്ലൈറ്റ്‌റഡാൽ24 (Flightradar24) പുറത്തുവിട്ട വിവരങ്ങൾ പ്രകാരം അവസാന നിമിഷങ്ങളിൽ വിമാനത്തിൻ്റെ ഉയരത്തിൽ വലിയ വ്യതിയാനങ്ങൾ സംഭവിച്ചിട്ടുണ്ട്.

35,000 അടി ഉയരത്തിൽ സാധാരണ നിലയിൽ സഞ്ചരിച്ചിരുന്ന വിമാനം സെക്കൻഡുകൾക്കുള്ളിൽ 1,100 അടിയിലേക്ക് കുത്തനെ താഴേക്ക് പതിച്ചതായാണ് റഡാർ ട്രാക്കിങ് വിവരങ്ങൾ വ്യക്തമാക്കുന്നത്.

ആകാശത്തുവെച്ച് തന്നെ വിമാനത്തിൻ്റെ നിയന്ത്രണം പൂർണ്ണമായും നഷ്ടപ്പെട്ടതാകാം വലിയ അപകടത്തിന് കാരണമായതെന്ന് വ്യോമയാന വിദഗ്ധർ വിലയിരുത്തുന്നു.

വിമാനം കാണാതായതിന് പിന്നാലെ അറേബ്യൻ കടലിൽ സർക്കാർ സംവിധാനങ്ങൾ വൻ രക്ഷാപ്രവർത്തനമാണ് ആരംഭിച്ചിരിക്കുന്നത്. പാകിസ്ഥാൻ എയർപോർട്ട് അതോറിറ്റിയുടെ നേതൃത്വത്തിൽ നാവികസേനയും വ്യോമസേനയും സംയുക്തമായാണ് തിരച്ചിൽ നടത്തുന്നത്.

പാക് നാവികസേനയുടെ പിഎൻഎസ് സുൽഫിക്കർ (PNS Zulfiqar) എന്ന അത്യാധുനിക യുദ്ധക്കപ്പലും, വ്യോമസേനയുടെ പ്രത്യേക നിരീക്ഷണ വിമാനങ്ങളും രംഗത്തുണ്ട്. ഇതിനുപുറമെ പാകിസ്ഥാൻ നാഷണൽ ഷിപ്പിംഗ് കോർപ്പറേഷന്റെ വാണിജ്യ കപ്പലുകളും മേഖലയിൽ വിന്യസിച്ചിട്ടുണ്ട്.

എന്നാൽ ഇതുവരെ വിമാനത്തിന്റെ അവശിഷ്ടങ്ങളോ ജീവനക്കാരെക്കുറിച്ചുള്ള വിവരങ്ങളോ എമർജൻസി സിഗ്നലുകളോ ലഭിച്ചിട്ടില്ല.

അപകടത്തിൽപ്പെട്ട ബോയിങ് 737-400 വിമാനത്തിന് ഏകദേശം 27.5 വർഷത്തെ പഴക്കമുണ്ടെന്നാണ് റിപ്പോർട്ടുകൾ വ്യക്തമാക്കുന്നത്. ദീർഘകാലം യാത്രാവിമാനമായി സർവീസ് നടത്തിയിരുന്ന ഈ വിമാനം 2012-ലാണ് പൂർണ്ണമായും കാർഗോ ആവശ്യങ്ങൾക്കുള്ള ചരക്കുവിമാനമാക്കി മാറ്റിയത്.

പിന്നീട് കഴിഞ്ഞ വർഷം ജൂലൈയിലാണ് കെ2 എയർവേയ്‌സ് ഇത് ലീസിനെടുത്ത് സർവീസ് ആരംഭിച്ചത്. അഞ്ച് ജീവനക്കാരുടെ ജീവന് വേണ്ടിയുള്ള പ്രാർത്ഥനയിലാണ് വ്യോമയാന ലോകം.