ദുബായിൽ പ്രധാന തുരങ്കപാത അടച്ചിടുന്നു; എമിറേറ്റ്സ് റോഡിൽ പുതിയ ഗതാഗത ക്രമീകരണം

ദുബായ്: എമിറേറ്റ്സ് റോഡ് വികസന പദ്ധതിയുടെ ഭാഗമായി ദുബായിലെ പ്രധാന പാതയായ അൽ അയാസ് തുരങ്കം (Al Ayas Tunnel) അടച്ചിടുന്നു.

ജൂലൈ നാല് മുതൽ രണ്ട് മാസത്തേക്കാണ് തുരങ്കം അടച്ചിടുന്നതെന്ന് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) അറിയിച്ചു.

എമിറേറ്റ്സ് റോഡിലെ ഗതാഗതക്കുരുക്ക് കുറയ്ക്കാനും ഭാവിയിൽ യാത്ര കൂടുതൽ സുഗമമാക്കാനും ലക്ഷ്യമിട്ടുള്ള ബൃഹത്തായ നിർമ്മാണ പ്രവർത്തനങ്ങൾക്കായാണ് ഈ താൽക്കാലിക ക്രമീകരണം.

തുരങ്കം അടച്ചിടുന്ന സാഹചര്യത്തിൽ ഈ ഭാഗത്ത് പുതിയ ഗതാഗത വഴിതിരിച്ചുവിടൽ (Traffic diversion) പദ്ധതി ആർടിഎ നടപ്പിലാക്കും.

രണ്ട് മാസത്തോളം നീണ്ടുനിൽക്കുന്ന ഈ നിയന്ത്രണം ദിനംപ്രതി എമിറേറ്റ്സ് റോഡ് ഉപയോഗിക്കുന്ന ആയിരക്കണക്കിന് യാത്രികരെ ബാധിക്കാൻ സാധ്യതയുണ്ട്. അതിനാൽ യാത്രക്കാർ തങ്ങളുടെ യാത്രകൾ മുൻകൂട്ടി പ്ലാൻ ചെയ്യണമെന്ന് അധികൃതർ കർശന നിർദ്ദേശം നൽകി.

ഈ കാലയളവിൽ വാഹനങ്ങൾക്ക് സുഗമമായി സഞ്ചരിക്കാൻ മറ്റ് ബദൽ മാർഗ്ഗങ്ങൾ ഒരുക്കിയിട്ടുണ്ടെന്നും ആർടിഎ വ്യക്തമാക്കി.

ദുബായിലെ ഗതാഗത സംവിധാനങ്ങൾ കൂടുതൽ മെച്ചപ്പെടുത്തുന്നതിന്റെ ഭാഗമായാണ് എമിറേറ്റ്സ് റോഡിൽ വികസനം നടപ്പിലാക്കുന്നത്.

ഈ പദ്ധതിയുടെ ഭാഗമായി ഷാർജ അതിർത്തിയിൽ നിന്ന് അൽ അമർദി സ്ട്രീറ്റിലേക്കുള്ള അഞ്ച് കിലോമീറ്റർ ഭാഗത്ത് രണ്ട് പുതിയ ലെയ്നുകൾ കൂടി കൂട്ടിച്ചേർക്കും. ദുബായിയെ മറ്റ് എമിറേറ്റുകളുമായി ബന്ധിപ്പിക്കുന്ന പ്രധാന പാതയായതിനാൽ എമിറേറ്റ്സ് റോഡിൽ വലിയ ഗതാഗതത്തിരക്കാണ് അനുഭവപ്പെടാറുള്ളത്.

പുതിയ ലെയ്നുകൾ വരുന്നതോടെ തിരക്കേറിയ സമയങ്ങളിൽ ഈ പ്രധാന പാതയിലെ യാത്രാസമയം 25 ശതമാനം കുറയ്ക്കാൻ സാധിക്കുമെന്നാണ് ആർടിഎയുടെ വിലയിരുത്തൽ.

വേനൽക്കാല അവധിയായതിനാൽ റോഡുകളിൽ വാഹനങ്ങളുടെ തിരക്ക് താരതമ്യേന കുറവായിരിക്കും.

ഇത് കണക്കിലെടുത്താണ് വികസന പ്രവർത്തനങ്ങൾ വേഗത്തിൽ പൂർത്തിയാക്കാൻ ജൂലൈ മുതൽ സെപ്റ്റംബർ വരെയുള്ള സമയം തന്നെ അധികൃതർ തിരഞ്ഞെടുത്തത്.

ഗതാഗത കുരുക്ക് ഒഴിവാക്കാൻ യാത്രക്കാർ നിർദ്ദേശിക്കപ്പെട്ട ബദൽ പാതകൾ ഉപയോഗിക്കണമെന്നും, ദിനംപ്രതിയുള്ള യാത്രകളുടെ സമയക്രമത്തിൽ മാറ്റം വരുത്താൻ ശ്രദ്ധിക്കണമെന്നും ആർടിഎ ഓർമ്മിപ്പിച്ചു.

നിർമ്മാണ പ്രവർത്തനങ്ങൾ പൂർത്തിയാകുന്നതോടെ എമിറേറ്റ്സ് റോഡിലെ ഗതാഗതം കൂടുതൽ സുഗമമാകുമെന്നും പ്രവാസികൾ ഉൾപ്പെടെയുള്ള യാത്രക്കാർക്ക് ഇത് വലിയ ആശ്വാസമാകുമെന്നും അധികൃതർ അറിയിച്ചു.