ദോഹ: ഖത്തറിൻ്റെ വ്യവസായ മേഖലയിൽ വൻ കുതിച്ചുചാട്ടത്തിന് വഴിയൊരുക്കുന്ന പുതിയ പ്രഖ്യാപനം പുറത്ത്.
മെസൈഈദ് ഇൻഡസ്ട്രിയൽ സിറ്റിയിൽ (Mesaieed Industrial City) പുതിയ വ്യവസായ മേഖല (Medium Industries Area) വികസിപ്പിക്കുന്നതിനായി ഖത്തർ എനർജിയും (QatarEnergy) വാണിജ്യ വ്യവസായ മന്ത്രാലയവും (MoCI) തമ്മിൽ പുതിയ ധാരണയിലൊപ്പുവെച്ചു.
രാജ്യത്തെ വ്യവസായ വൈവിധ്യവൽക്കരണ അജണ്ടയുടെ ഭാഗമായാണ് ഈ നിർണായക ചുവടുവെപ്പ്.
ഖത്തർ എനർജി ആസ്ഥാനത്ത് നടന്ന ചടങ്ങിൽ വാണിജ്യ വ്യവസായ മന്ത്രി ഷെയ്ഖ് ഫൈസൽ ബിൻ താനി ബിൻ ഫൈസൽ അൽതാനി, ഊർജ്ജ കാര്യ സഹമന്ത്രിയും ഖത്തർ എനർജി സിഇഒയുമായ സാദ് ഷെരീദ അൽ കഅബി എന്നിവർ പങ്കെടുത്തു.
ഹൈഡ്രോകാർബൺ അധിഷ്ഠിത വിഭവങ്ങൾ, പ്രകൃതിവാതകം, വൈദ്യുതി എന്നിവ വ്യവസായ നിക്ഷേപങ്ങൾക്കായി ഉപയോഗപ്പെടുത്തുന്നതിനുള്ള പുതിയ രൂപരേഖയ്ക്കാണ് ഇരുവരും ഔദ്യോഗികമായി അംഗീകാരം നൽകിയത്.
പുതിയ സംരംഭങ്ങളിലൂടെ വ്യവസായ മേഖലയുടെ മത്സരക്ഷമത ഉയർത്താനും ദേശീയ വിഭവങ്ങൾ കൂടുതൽ ഫലപ്രദമായി ഉപയോഗിക്കാനും സാധിക്കുമെന്ന് വാണിജ്യ മന്ത്രാലയം വ്യക്തമാക്കി.
നിക്ഷേപകരെ കണ്ടെത്തുക, അവർക്ക് ആവശ്യമായ മാർഗ്ഗനിർദ്ദേശങ്ങൾ നൽകുക തുടങ്ങിയ കാര്യങ്ങൾക്ക് മന്ത്രാലയം നേതൃത്വം നൽകും. വിഭവങ്ങളുടെ വിതരണത്തിലും സാങ്കേതിക-വാണിജ്യ കാര്യങ്ങളിലും ഖത്തർ എനർജി വിദഗ്ധ സഹായം ലഭ്യമാക്കും.
ദോഹ ഇൻഡസ്ട്രിയൽ ഏരിയയിലെ ചെറുകിട-ഇടത്തരം വ്യവസായങ്ങൾക്ക് നൽകുന്നതിന് സമാനമായ രീതിയിൽ പുതിയ വ്യവസായ മേഖലയ്ക്കും ആവശ്യമായ പ്രകൃതിവാതകം ലഭ്യമാക്കുമെന്ന് സാദ് ഷെരീദ അൽ കഅബി അറിയിച്ചു.
ഖത്തറിലെ പ്രവാസി സമൂഹത്തിന്, പ്രത്യേകിച്ച് ഇന്ത്യക്കാർക്ക് വലിയ പ്രതീക്ഷ നൽകുന്നതാണ് പുതിയ തീരുമാനം.
മെസൈഈദ്, റാസ് ലഫാൻ എന്നിവിടങ്ങളിലെ വ്യവസായ മേഖലകളിൽ നിലവിൽ തന്നെ നിരവധി ഇന്ത്യൻ എഞ്ചിനീയർമാരും ടെക്നീഷ്യന്മാരും കരാറുകാരും ലോജിസ്റ്റിക്സ് തൊഴിലാളികളും ജോലി ചെയ്യുന്നുണ്ട്.
പുതിയ വ്യവസായ മേഖല പ്രവർത്തനസജ്ജമാകുന്നതോടെ ഈ രംഗത്ത് കൂടുതൽ തൊഴിലവസരങ്ങളും സബ് കോൺട്രാക്റ്റിംഗ് സാധ്യതകളും തുറന്നുകിട്ടുമെന്നാണ് സാമ്പത്തിക വിദഗ്ധരുടെ വിലയിരുത്തൽ.
