ദോഹ: ഇന്ത്യ-ഖത്തർ ബന്ധത്തിലെ പുതിയ ഘട്ടത്തിൽ പ്രവാസി സമൂഹത്തിൻ്റെ ക്ഷേമത്തിന് പ്രത്യേക പ്രാധാന്യം നൽകി വിദേശകാര്യ മന്ത്രി ഡോ. എസ്. ജയശങ്കറിൻ്റെ ദോഹ സന്ദർശനം.
ഗൾഫ് നയതന്ത്രത്തിൽ ഖത്തറിലെ ഇന്ത്യൻ സമൂഹത്തിൻ്റെ ക്ഷേമം സുപ്രധാന ഘടകമാണെന്ന് അദ്ദേഹം വ്യക്തമാക്കി.
ദോഹയിൽ വെച്ച് ഖത്തറിലെ ഇന്ത്യൻ സമൂഹ പ്രതിനിധികളുമായി അദ്ദേഹം കൂടിക്കാഴ്ച നടത്തി. തൊഴിൽ, സുരക്ഷ, സമൂഹ പിന്തുണ, ജനങ്ങൾ തമ്മിലുള്ള ബന്ധം എന്നിവയുൾപ്പെടെ പ്രവാസികൾക്ക് നേരിട്ട് പ്രയോജനം ചെയ്യുന്ന കാര്യങ്ങളാണ് പ്രധാനമായും ചർച്ചയായത്.
ഗൾഫ് മേഖലയുമായുള്ള ഇന്ത്യയുടെ ഇടപെടലുകളിൽ community welfare ഒരു നിർണായക തൂണാണെന്ന് അദ്ദേഹം ചൂണ്ടിക്കാട്ടി.
ഖത്തർ സമൂഹത്തിന് ഇന്ത്യൻ പ്രവാസികൾ നൽകുന്ന വലിയ സംഭാവനകളെ വിദേശകാര്യ മന്ത്രി പ്രശംസിച്ചു.
പ്രയാസകരമായ കാലഘട്ടങ്ങളിൽ പോലും പ്രവാസികൾ പുലർത്തുന്ന പ്രതിബദ്ധത എടുത്തുപറയേണ്ടതാണെന്ന് അദ്ദേഹം ചൂണ്ടിക്കാട്ടി.
ഇന്ത്യ-ഖത്തർ പങ്കാളിത്തം കൂടുതൽ മികച്ച രീതിയിൽ മുന്നോട്ട് കൊണ്ടുപോകുന്നതിന് പ്രവാസികളുടെ അനുഭവങ്ങളും നിർദേശങ്ങളും വളരെ വിലപ്പെട്ടതാണെന്നും അദ്ദേഹം കൂട്ടിച്ചേർത്തു.
സമൂഹ പ്രതിനിധികളുമായുള്ള കൂടിക്കാഴ്ചയ്ക്ക് മുൻപായി അദ്ദേഹം ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുറഹ്മാൻ അൽതാനിയുമായി ചർച്ച നടത്തിയിരുന്നു.
ഊർജം, വ്യാപാരം, നിക്ഷേപം, connectivity, സുരക്ഷാ വിഷയങ്ങൾ എന്നീ മേഖലകളിലെ സഹകരണം ഇരു നേതാക്കളും അവലോകനം ചെയ്തു. ഖത്തറിലെ ഇന്ത്യൻ സമൂഹത്തിന്റെ സുരക്ഷയും ക്ഷേമവും ഉറപ്പാക്കുന്നതിൽ ഖത്തർ നേതൃത്വം നൽകുന്ന പിന്തുണയ്ക്ക് അദ്ദേഹം പ്രത്യേകം നന്ദി അറിയിച്ചു.
ജൂലൈ അഞ്ച് മുതൽ പത്ത് വരെ നീളുന്ന ഗൾഫ് പര്യടനത്തിൻ്റെ ആദ്യ ഘട്ടമായാണ് വിദേശകാര്യ മന്ത്രി ഖത്തറിലെത്തിയത്. ഖത്തറിന് പുറമെ ബഹ്റൈൻ, കുവൈത്ത്, ഒമാൻ എന്നീ രാജ്യങ്ങളും അദ്ദേഹം സന്ദർശിക്കുന്നുണ്ട്.
പ്രവാസികളുടെ തൊഴിൽസുരക്ഷ, കോൺസുലർ സഹായം, മേഖലയിലെ സുരക്ഷാ പശ്ചാത്തലത്തിലുള്ള യാത്രാ വിഷയങ്ങൾ, ഊർജ വിപണി എന്നിവ ഈ സന്ദർശനത്തിൽ ഏറെ പ്രാധാന്യമർഹിക്കുന്ന കാര്യങ്ങളായി തുടരുന്നു.
Leave a Comment