ദോഹ: ഖത്തർ നാഷണൽ സൈബർ സെക്യൂരിറ്റി ഏജൻസിയുടെ (NCSA) നാഷണൽ സൈബർ സെക്യൂരിറ്റി അക്കാദമി മൂന്നാമത് ‘സമ്മർ സൈബർ യൂത്ത് ക്യാമ്പ് 2026’ ലേക്ക് രജിസ്ട്രേഷൻ ആരംഭിച്ചു. വിദ്യാഭ്യാസ ഉന്നതവിദ്യാഭ്യാസ മന്ത്രാലയവുമായി (MoEHE) സഹകരിച്ച് സംഘടിപ്പിക്കുന്ന ക്യാമ്പിലേക്ക് ഖത്തറിലെ സർക്കാർ, സ്വകാര്യ സ്കൂളുകളിൽ പഠിക്കുന്ന 13 മുതൽ 17 വയസ്സ് വരെയുള്ള വിദ്യാർത്ഥികൾക്കാണ് അവസരം. 2026 ജൂലൈ 12 മുതൽ ഓഗസ്റ്റ് 6 വരെ 20 പ്രവൃത്തി ദിനങ്ങളിലായാണ് പരിശീലനം നടക്കുക.
പെൺകുട്ടികൾക്കും ആൺകുട്ടികൾക്കുമായി വ്യത്യസ്ത സമയങ്ങളിലാണ് ക്യാമ്പിന്റെ ദൈനംദിന ഷെഡ്യൂൾ ക്രമീകരിച്ചിരിക്കുന്നത്. പെൺകുട്ടികൾക്ക് രാവിലെയും ആൺകുട്ടികൾക്ക് ഉച്ചയ്ക്ക് ശേഷവുമായിരിക്കും പരിശീലന ക്ലാസുകൾ. പ്രതിദിനം 5 മണിക്കൂർ വീതം നീളുന്ന ക്ലാസുകളിൽ സൈബർ സെക്യൂരിറ്റി അടിസ്ഥാന വിവരങ്ങൾ, ഡിജിറ്റൽ സുരക്ഷ, സൈബർ സുരക്ഷാ വെല്ലുവിളികൾ, പ്രായോഗിക പരിശീലനങ്ങൾ, വർക്ക്ഷോപ്പുകൾ, ഫീൽഡ് വിസിറ്റുകൾ എന്നിവ ഉൾപ്പെടുത്തിയിട്ടുണ്ട്. അറബിക്, ഇംഗ്ലീഷ് ഭാഷകളിലായിരിക്കും ക്ലാസുകൾ ലഭ്യമാകുക.
വേനലവധിക്കാലത്ത് കുട്ടികൾക്ക് ഉപകാരപ്രദമായ സാങ്കേതിക അറിവുകൾ നൽകാൻ ആഗ്രഹിക്കുന്ന പ്രവാസി മലയാളി കുടുംബങ്ങൾക്ക് ഈ ക്യാമ്പ് മികച്ചൊരു അവസരമാണ്. ഖത്തറിലെ ഇന്ത്യൻ സ്കൂളുകളിലും മറ്റ് സ്വകാര്യ സ്കൂളുകളിലും പഠിക്കുന്ന ടെക്നോളജിയിൽ താല്പര്യമുള്ള കുട്ടികൾക്ക് ഇതിൽ പങ്കെടുക്കാം. ക്യാമ്പിലേക്ക് തിരഞ്ഞെടുക്കപ്പെടുന്നതിന് പ്രവേശന പരീക്ഷ വിജയിക്കേണ്ടതുണ്ട്. കൂടാതെ സ്വന്തമായി ലാപ്ടോപ്പും മുഴുവൻ സമയ പങ്കാളിത്തവും അനിവാര്യമാണ്. താത്പര്യമുള്ളവർക്ക് 2026 ജൂൺ 30 വരെ ക്യാമ്പിലേക്ക് രജിസ്റ്റർ ചെയ്യാം.
ബാങ്കിങ്, ഹെൽത്ത് കെയർ, വിദ്യാഭ്യാസം തുടങ്ങി എല്ലാ മേഖലകളിലും ഡിജിറ്റൽ സുരക്ഷ ഒഴിച്ചുകൂടാനാവാത്ത ഒന്നായി മാറിയ സാഹചര്യത്തിൽ, കരിയറിൽ മികച്ച മുന്നേറ്റം ആഗ്രഹിക്കുന്ന കുട്ടികൾക്കായി രക്ഷിതാക്കൾ ഔദ്യോഗിക വെബ്സൈറ്റ് വഴി അപേക്ഷകൾ സമർപ്പിക്കേണ്ടതാണ്.
Leave a Comment