താൽക്കാലിക ഗാർഹിക തൊഴിലാളികളെ നിയമിക്കുന്നവർക്ക് ദുബായ് പൊലീസിൻ്റെ സുരക്ഷാ മുന്നറിയിപ്പ്

ദൂബായ്: വീട്ടുജോലിയ്ക്ക് ആളെ നിയമിക്കുമ്പോഴും താൽക്കാലിക ജീവനക്കാരെ തെരഞ്ഞെടുക്കുമ്പോഴും ആംഗീകൃത ഏജൻസികൾ മാത്രം ഉപയോഗിക്കണമെന്ന് ദുബായ് പോലീസ്.

ദുബായ് പൊലീസിൻ്റെ ക്രിമിനൽ ഇൻവെസ്റ്റിഗേഷൻ ജനറൽ ഡിപ്പാർട്ട്‌മെൻ്റിന് കീഴിലുള്ള ക്രൈം പ്രിവൻഷൻ വിഭാഗമാണ് ഈ പ്രത്യേക അറിയിപ്പ് പുറപ്പെടുവിച്ചത്. സുരക്ഷ ശക്തമാക്കുന്നതിനും കുറ്റകൃത്യങ്ങൾ തടയുന്നതിനുമായി നടത്തുന്ന ബോധവൽക്കരണ കാമ്പെയ്‌ൻ്റെ ഭാഗമായാണ് ഈ നടപടി. അപരിചിതരായ വ്യക്തികളെ വീടുകളിൽ ജോലിക്ക് നിർത്തുന്നത് വലിയ സാമ്പത്തിക നഷ്ടങ്ങൾക്കും സുരക്ഷാ വീഴ്ചകൾക്കും കാരണമായേക്കാം.

രേഖകൾ പരിശോധിക്കണം

ഗാർഹിക തൊഴിലാളികളെ വീടുകളിൽ പ്രവേശിപ്പിക്കുന്നതിന് മുമ്പ് അവരുടെ ഔദ്യോഗിക തിരിച്ചറിയൽ രേഖകൾ കൃത്യമായി പരിശോധിക്കണമെന്ന് പൊലീസ് ആവശ്യപ്പെട്ടു. രേഖകൾ പരിശോധിക്കാൻ സാധിക്കാത്ത അല്ലെങ്കിൽ കൃത്യമല്ലാത്ത വ്യക്തികൾക്ക് ഒരു കാരണവശാലും വീടുകളിൽ പ്രവേശനം നൽകരുത്.

ഇത്തരം കാര്യങ്ങളിൽ പുലർത്തുന്ന ചെറിയ അശ്രദ്ധ പോലും വലിയ അപകടങ്ങളിലേക്ക് വഴിമാറാം. അതിനാൽ വീട്ടുടമസ്ഥർ നിയമപരമായ റിക്രൂട്ട്മെൻ്റ് ചാനലുകൾ മാത്രം ഉപയോഗിക്കാൻ ശ്രദ്ധിക്കണം.

Dubai Police Warning സുരക്ഷാ മുൻകരുതലുകൾ

താൽക്കാലിക തൊഴിലാളികൾ വീടുകളിൽ ഉള്ളപ്പോൾ വിലപിടിപ്പുള്ള വസ്തുക്കൾ സുരക്ഷിതമായി സൂക്ഷിക്കാൻ വീട്ടുടമസ്ഥർ ശ്രദ്ധിക്കണം. പണം, സ്വർണം തുടങ്ങിയവ തുറന്ന സ്ഥലങ്ങളിൽ വെക്കരുതെന്നും നിർദേശമുണ്ട്.

ഈ മുൻകരുതലുകൾ മോഷണ സാധ്യതകൾ പൂർണ്ണമായും ഇല്ലാതാക്കാൻ സഹായിക്കും. പ്രധാനമായും താഴെ പറയുന്ന മുൻകരുതലുകൾ താമസക്കാർ സ്വീകരിക്കേണ്ടതാണ്:

• അംഗീകൃത ഏജൻസികളെ മാത്രം ആശ്രയിക്കുക
• തൊഴിലാളികളുടെ ഐഡൻ്റിറ്റി മുൻകൂട്ടി ഉറപ്പാക്കുക
• പണം, ആഭരണങ്ങൾ എന്നിവ ദൃശ്യമാകുന്ന രീതിയിൽ വെക്കരുത്
• പ്രധാനപ്പെട്ട ഔദ്യോഗിക രേഖകൾ സുരക്ഷിത ലോക്കറുകളിൽ സൂക്ഷിക്കുക

കുട്ടികളുടെയും മുതിർന്നവരുടെയും സുരക്ഷ

വീടുകളിലെ കുട്ടികളെയും പ്രായമായ ബന്ധുക്കളെയും അപരിചിതരായ താൽക്കാലിക തൊഴിലാളികൾക്കൊപ്പം തനിച്ചാക്കി പോകരുതെന്ന് പൊലീസ് പ്രത്യേകം ഓർമ്മിപ്പിച്ചു. വിശ്വസ്തരല്ലാത്ത വ്യക്തികളുടെ കൂടെ ഇവരെ വിടുന്നത് ഒട്ടും സുരക്ഷിതമല്ല.

കുടുംബാംഗങ്ങളുടെ സുരക്ഷ ഉറപ്പാക്കുന്നത് വീട്ടിലുള്ള എല്ലാവരുടെയും കൂട്ടായ ഉത്തരവാദിത്തമാണ്. തൊഴിലാളികളുടെ ഭാഗത്തുനിന്നും എന്തെങ്കിലും തരത്തിലുള്ള അസ്വാഭാവിക പെരുമാറ്റം ഉണ്ടായാൽ അത് ഉടൻ തന്നെ അധികൃതരെ അറിയിക്കണം.

പരാതിപ്പെടേണ്ട രീതി

ഗാർഹിക സുരക്ഷ ഉറപ്പാക്കുന്നതിൽ പൊതുജനങ്ങളുടെ ജാഗ്രത വളരെ വലിയ പങ്കുവഹിക്കുന്നുണ്ടെന്ന് പൊലീസ് പറഞ്ഞു. താൽക്കാലിക തൊഴിലാളികളുടെ സംശയാസ്പദമായ നീക്കങ്ങൾ കണ്ടാൽ ദുബായ് പൊലീസിൻ്റെ സ്മാർട്ട് ആപ്പ് വഴി റിപ്പോർട്ട് ചെയ്യാം.

ആപ്പിലെ ‘പൊലീസ് ഐ’ (Police Eye) എന്ന ഫീച്ചർ വഴിയാണ് വിവരങ്ങൾ കൈമാറേണ്ടത്. അടിയന്തിരമല്ലാത്ത ആവശ്യങ്ങൾക്കായി 901 എന്ന ഹെൽപ്പ്‌ലൈൻ നമ്പറിലും ബന്ധപ്പെടാവുന്നതാണ്. സുരക്ഷിതമായ ഒരു സാമൂഹിക അന്തരീക്ഷം നിലനിർത്താൻ എല്ലാവരും ഈ നിർദേശങ്ങൾ പാലിക്കണം.