ഇന്ത്യൻ പാസ്‌പോർട്ട് നിരക്കുകളിൽ വൻ വർധനവ്; ജൂലൈ 1 മുതൽ പുതിയ നിരക്കുകൾ പ്രാബല്യത്തിൽ, പ്രവാസികൾക്കും തിരിച്ചടി

ന്യൂഡൽഹി: പുതിയ പാസ്‌പോർട്ട് എടുക്കുന്നതിനും കാലാവധി കഴിഞ്ഞവ പുതുക്കുന്നതിനുമുള്ള ഫീസ് കുത്തനെ വർധിപ്പിച്ച് ഇന്ത്യൻ വിദേശകാര്യ മന്ത്രാലയം. 2026 ജൂലൈ 1 മുതൽ പുതിയ നിരക്കുകൾ പ്രാബല്യത്തിൽ വരും.

വിവിധ പാസ്‌പോർട്ട് സേവനങ്ങൾക്ക് 75 ശതമാനം വരെയാണ് ഫീസ് വർധിപ്പിച്ചിട്ടുള്ളത്. 2012-ന് ശേഷം ആദ്യമായാണ് പാസ്‌പോർട്ട് സേവന നിരക്കുകളിൽ ഇത്രയും വലിയൊരു മാറ്റം വരുത്തുന്നത്.

പുതിയ പാസ്‌പോർട്ടിന് അപേക്ഷിക്കുന്ന രാജ്യത്തിനകത്തും പുറത്തുമുള്ള എല്ലാ പൗരന്മാർക്കും പുതിയ നിരക്കുകൾ ബാധകമാകും. യുഎഇ, ഖത്തർ ഉൾപ്പെടെയുള്ള ഗൾഫ് രാജ്യങ്ങളിലെ ലക്ഷക്കണക്കിന് പ്രവാസികൾക്ക് ഈ തീരുമാനം വലിയ സാമ്പത്തിക ബാധ്യതയാകും സൃഷ്ടിക്കുക.

പുതിയ നിരക്കുകൾ താഴെ പറയുന്നവയാണ്:

• സാധാരണ പാസ്‌പോർട്ട് (Normal): 36 പേജുള്ള സാധാരണ പാസ്‌പോർട്ടിന്റെ ഫീസ് നിലവിലെ 1,500 രൂപയിൽ നിന്ന് 2,500 രൂപയായി വർധിപ്പിച്ചു (67 ശതമാനം വർധന). 60 പേജുള്ള പാസ്‌പോർട്ടിന് ഇനി മുതൽ 3,500 രൂപ നൽകണം. നിലവിലിത് 2,000 രൂപയായിരുന്നു.
• തത്കാൽ പാസ്‌പോർട്ട് (Tatkal): അടിയന്തരമായി പാസ്‌പോർട്ട് ലഭിക്കുന്നതിനുള്ള തത്കാൽ സേവന നിരക്കുകളും വലിയ തോതിൽ ഉയർത്തിയിട്ടുണ്ട്. 36 പേജുള്ള തത്കാൽ പാസ്‌പോർട്ടിന് 5,000 രൂപയും, 60 പേജുള്ളതിന് 6,000 രൂപയുമാണ് പുതിയ നിരക്ക്.
• കുട്ടികളുടെ പാസ്‌പോർട്ട് (Minors): 18 വയസ്സിന് താഴെയുള്ള കുട്ടികളുടെ പുതിയ പാസ്‌പോർട്ടിനും പുതുക്കുന്നതിനുമുള്ള ഫീസ് 1,000 രൂപയിൽ നിന്ന് 1,750 രൂപയായി (36 പേജ്) വർധിപ്പിച്ചു. കുട്ടികളുടെ തത്കാൽ പാസ്‌പോർട്ടിന് പുതിയ നിരക്ക് 4,250 രൂപയാണ്.
• പാസ്‌പോർട്ട് നഷ്ടപ്പെട്ടാൽ (Lost/Damaged): പാസ്‌പോർട്ട് നഷ്ടപ്പെടുകയോ കേടുപാടുകൾ സംഭവിക്കുകയോ ചെയ്താൽ പുതിയത് എടുക്കുന്നതിന് കൂടുതൽ തുക നൽകണം. 36 പേജുള്ള പാസ്‌പോർട്ടിന് 5,000 രൂപയും (സാധാരണ), 7,500 രൂപയും (തത്കാൽ) ആണ് ഫീസ്. 60 പേജിനാണെങ്കിൽ ഇത് യഥാക്രമം 6,000 രൂപയും 8,500 രൂപയുമായിരിക്കും.

കൂടാതെ, വിദേശ രാജ്യങ്ങളിലെ എംബസികൾ വഴി നൽകുന്ന സേവന നിരക്കുകളിലും കാര്യമായ മാറ്റമുണ്ട്.

എമർജൻസി സർട്ടിഫിക്കറ്റിന് (Emergency Certificate) വിദേശത്ത് 15 യുഎസ് ഡോളറും, പോലീസ് ക്ലിയറൻസ് സർട്ടിഫിക്കറ്റ് (PCC), സറണ്ടർ സർട്ടിഫിക്കറ്റ് തുടങ്ങിയവയ്ക്ക് 40 യുഎസ് ഡോളറുമാണ് (USD 40) പുതിയ നിരക്കായി നിശ്ചയിച്ചിരിക്കുന്നത്. ഇന്ത്യക്കകത്ത് ഇതിന് 750 രൂപയാണ് ഈടാക്കുക.

ഗൾഫ് രാജ്യങ്ങളിലെ എംബസികളും കോൺസുലേറ്റുകളും പുതിയ ഫീസ് നിരക്കുകൾ പ്രാദേശിക കറൻസിയിൽ ഉടൻ തന്നെ പ്രസിദ്ധീകരിക്കുമെന്നാണ് പ്രതീക്ഷിക്കുന്നത്.

വിദേശകാര്യ മന്ത്രാലയം പാസ്‌പോർട്ട് നിയമങ്ങളിൽ വരുത്തിയ പുതിയ ഭേദഗതി (Passports Amendment Rules 2026) ജൂലൈ 1-ന് ശേഷമുള്ള എല്ലാ അപേക്ഷകൾക്കും കർശനമായും ബാധകമായിരിക്കും.