പശ്മേചിമേഷ്യൻ മേഖലയിൽ സമാധാനവും സുരക്ഷയും പുനഃസ്ഥാപിക്കാൻ ലക്ഷ്യമിട്ട് ഖത്തർ അമീർ ശൈഖ് തമീം ബിൻ ഹമദ് അൽഥാനി അമേരിക്കൻ പ്രസിഡന്റ് ഡൊണാൾഡ് ട്രംപുമായും മറ്റ് അറബ് പ്രാദേശിക നേതാക്കളുമായും സംയുക്ത ഫോൺ കോൾ നടത്തി. മധ്യപൂർവേഷ്യയിൽ വഷളായിക്കൊണ്ടിരിക്കുന്ന സുരക്ഷാ സാഹചര്യങ്ങൾ ചർച്ച ചെയ്ത അമീർ, കൂടുതൽ പ്രകോപനപരമായ നടപടികൾ ഒഴിവാക്കേണ്ടതിന്റെ ആവശ്യകത ഊന്നിപ്പറഞ്ഞു.

മേഖലയിലെ സംഘർഷങ്ങൾ കുറയ്ക്കുന്നതിനും സമാധാനപരമായ പരിഹാരങ്ങൾ കണ്ടെത്തുന്നതിനുമായി ഒന്നിച്ച് പ്രവർത്തിക്കാനുള്ള സന്നദ്ധത ഖത്തർ അറിയിച്ചു. പ്രാദേശിക അസ്ഥിരത ആഗോള സുരക്ഷയെ ബാധിക്കുന്ന സാഹചര്യത്തിൽ, എല്ലാ ഭാഗങ്ങളും ജാഗ്രത പാലിക്കണമെന്നും ചർച്ചയിലൂടെ പ്രശ്നങ്ങൾ പരിഹരിക്കണമെന്നും അമീർ വ്യക്തമാക്കി.

അമേരിക്ക, ഖത്തർ എന്നിവർക്ക് പുറമെ ഈജിപ്ത്, യുഎഇ, ജോർദാൻ തുടങ്ങിയ രാജ്യങ്ങളിലെ നേതാക്കളും ഈ നിർണായക ഫോൺ കോളിൽ പങ്കെടുത്തതായാണ് റിപ്പോർട്ടുകൾ. ഗൾഫ് രാജ്യങ്ങളും അമേരിക്കയും തമ്മിലുള്ള ശക്തമായ നയതന്ത്ര ബന്ധം ഉപയോഗിച്ച് മേഖലയിലെ പ്രശ്നങ്ങൾ പരിഹരിക്കാനുള്ള ശ്രമങ്ങൾ തുടരുമെന്ന് അമീർ ഉറപ്പ് നൽകി.