ദോഹ: ആഗോള സുരക്ഷാ വെല്ലുവിളികൾക്കിടയിൽ നയതന്ത്ര തന്ത്രപ്രധാന നീക്കങ്ങൾ ശക്തമാക്കി ഖത്തർ. സിംഗപ്പൂരിൽ നടക്കുന്ന ആഗോള സുരക്ഷാ ഉച്ചകോടിയായ ഷാംഗ്രി-ലാ ഡയലോഗ് 2026-ൽ പങ്കെടുക്കാനെത്തിയ ഖത്തർ ഉപപ്രധാനമന്ത്രിയും പ്രതിരോധകാര്യ സഹമന്ത്രിയുമായ ശൈഖ് സൗദ് ബിൻ അബ്ദുൽറഹ്മാൻ ബിൻ ഹസൻ അൽതാനി, സിംഗപ്പൂർ സീനിയർ മിനിസ്റ്ററും മുൻ പ്രധാനമന്ത്രിയുമായ ലീ ഷിയൻ ലൂങ്ങുമായി കൂടിക്കാഴ്ച നടത്തി. സിംഗപ്പൂർ പ്രസിഡൻഷ്യൽ കൊട്ടാരത്തിൽ വെച്ചായിരുന്നു ഇരുനേതാക്കളും തമ്മിലുള്ള നിർണായക ചർച്ച നടന്നത്.

പശ്ചിമേഷ്യയിലെ ഏറ്റവും പുതിയ സുരക്ഷാ സംഭവവികാസങ്ങളും നിലവിലെ ആഗോള സാഹചര്യങ്ങളിൽ ഇരുരാജ്യങ്ങളും തമ്മിൽ പുലർത്തേണ്ട സംയുക്ത സഹകരണവും ഏകോപനവും യോഗത്തിൽ പ്രധാന ചർച്ചാവിഷയമായി. ഖത്തർ അംബാസഡർ അബ്ദുൽഅസീസ് ബിൻ അഹമ്മദ് അൽ മാൽക്കി അൽ ജെഹാനി ഉൾപ്പെടെ ഇരുരാജ്യങ്ങളിലെയും ഉന്നത നയതന്ത്ര, പ്രതിരോധ ഉദ്യോഗസ്ഥരും ചർച്ചയിൽ പങ്കെടുത്തു. അന്താരാഷ്ട്ര തലത്തിൽ സമാധാനവും സുസ്ഥിരതയും നിലനിർത്താൻ ഖത്തർ നടത്തുന്ന സജീവ ഇടപെടലുകളുടെ ഭാഗമായാണ് ഈ സന്ദർശനം.

ഗൾഫ് മേഖലയിലെ സുരക്ഷ, വ്യോമഗതാഗതം, കടൽമാർഗ്ഗമുള്ള വ്യാപാരം, അന്താരാഷ്ട്ര ഇന്ധന വിതരണം എന്നിവയെല്ലാം പ്രവാസികളുടെ ദൈനംദിന ജീവിതത്തെയും സാമ്പത്തിക സുരക്ഷിതത്വത്തെയും നേരിട്ട് സ്വാധീനിക്കുന്ന ഘടകങ്ങളാണ്. ഈ പശ്ചാത്തലത്തിൽ, ആഗോള പ്രതിരോധ വേദിയിൽ ഖത്തർ നടത്തുന്ന ഇത്തരം ഉന്നതതല ചർച്ചകൾക്ക് പ്രവാസി സമൂഹം ഏറെ പ്രാധാന്യത്തോടെയാണ് ഉറ്റുനോക്കുന്നത്. മേഖലയിലെ സ്ഥിരത വിമാനയാത്രകളെയും തൊഴിൽ സുരക്ഷിതത്വത്തെയും വിപണിയിലെ വിലക്കയറ്റത്തെയും ബാധിക്കുമെന്നതിനാൽ ഈ സുരക്ഷാ ചർച്ചകൾ ഏറെ നിർണായകമാണ്.