ദോഹ: ഖത്തറിലെ സ്കൂളുകളിൽ രണ്ടാം സെമസ്റ്റർ അവസാന പരീക്ഷകൾക്കുള്ള ഒരുക്കങ്ങൾ പൂർത്തിയായതായി വിദ്യാഭ്യാസ-ഉന്നത വിദ്യാഭ്യാസ മന്ത്രാലയം (MoEHE) അറിയിച്ചു. ജൂൺ 4 വ്യാഴാഴ്ച മുതൽ വിവിധ ഗ്രേഡുകളിലെ പരീക്ഷകൾ ആരംഭിക്കും. പരീക്ഷാ കേന്ദ്രങ്ങൾ, സമയക്രമം എന്നിവ സംബന്ധിച്ച ക്രമീകരണങ്ങൾ പൂർത്തിയായതായി സ്റ്റുഡൻ്റ് അസസ്മെൻ്റ് ഡിപ്പാർട്ട്മെൻ്റ് ഡയറക്ടർ ഇബ്രാഹിം അബ്ദുല്ല റാഷിദ് അൽ മുഹന്നദി വ്യക്തമാക്കി.
ഗ്രേഡ് 12 തലത്തിൽ മാത്രം 16,487 വിദ്യാർഥികളാണ് ഇത്തവണ പരീക്ഷയ്ക്ക് രജിസ്റ്റർ ചെയ്തിരിക്കുന്നത്. പരീക്ഷാ നടത്തിപ്പിനായി രാജ്യത്തുടനീളം 87 കേന്ദ്രങ്ങളും 818 കമ്മിറ്റികളും സജ്ജീകരിച്ചിട്ടുണ്ട്. 4,406 മേൽനോട്ട ഉദ്യോഗസ്ഥരെയും പരീക്ഷാ ഡ്യൂട്ടിക്കായി നിയോഗിച്ചു. ഗ്രേഡ് 1 മുതൽ 12 വരെയുള്ള വിദ്യാർഥികൾക്കായി വ്യത്യസ്ത ഘട്ടങ്ങളിലായാണ് പരീക്ഷകൾ ക്രമീകരിച്ചിരിക്കുന്നത്. ഗ്രേഡ് 12 പരീക്ഷകൾ ജൂൺ 21 വരെ നീളും. രാവിലെ 8:00 മുതൽ 10:30 വരെയാണ് പരീക്ഷാ സമയം.
പരീക്ഷാ നടത്തിപ്പുമായി ബന്ധപ്പെട്ട് വിദ്യാർഥികളുടെ ആശങ്കകൾ പരിഹരിക്കാനും നിർദ്ദേശങ്ങളിൽ വ്യക്തത വരുത്താനും മന്ത്രാലയം പ്രത്യേക സർവേ നടത്തിയിരുന്നു. പരീക്ഷാകാലത്ത് കുട്ടികളിൽ മാനസിക സമ്മർദ്ദം ഉണ്ടാക്കുന്ന തരത്തിലുള്ള വ്യാജ വാർത്തകളോ അഭ്യൂഹങ്ങളോ പ്രചരിപ്പിക്കരുതെന്ന് അധികൃതർ കർശന നിർദ്ദേശം നൽകി. വിദ്യാർഥികൾക്ക് ആത്മവിശ്വാസത്തോടെ പരീക്ഷയെഴുതാനുള്ള അന്തരീക്ഷം ഒരുക്കാൻ എല്ലാവരും സഹകരിക്കണമെന്നും മന്ത്രാലയം അഭ്യർത്ഥിച്ചു.
പരീക്ഷാക്കാലത്ത് കുട്ടികൾക്ക് മതിയായ ഉറക്കം, കൃത്യമായ പഠനക്രമം, പോഷകാഹാരം എന്നിവ ലഭ്യമാക്കാൻ രക്ഷിതാക്കൾ പ്രത്യേകം ശ്രദ്ധിക്കണം. ഇന്ത്യൻ കമ്മ്യൂണിറ്റി സ്കൂളുകളിലെ ഉൾപ്പെടെ ആയിരക്കണക്കിന് പ്രവാസി വിദ്യാർഥികളാണ് പരീക്ഷയ്ക്ക് ഒരുങ്ങുന്നത്. പരീക്ഷാ ദിവസങ്ങളിലെ ഗതാഗതക്കുരുക്ക് ഒഴിവാക്കാൻ കൃത്യസമയത്ത് തന്നെ വിദ്യാർഥികളെ കേന്ദ്രങ്ങളിൽ എത്തിക്കാൻ രക്ഷിതാക്കൾ ശ്രദ്ധിക്കണമെന്നും അധികൃതർ ഓർമ്മിപ്പിച്ചു.
Leave a Comment