ദോഹ: ഖത്തറിൽ ജൂൺ മാസത്തേക്കുള്ള പുതുക്കിയ ഇന്ധനവില ഖത്തർ എനർജി പ്രഖ്യാപിച്ചു. പ്രീമിയം പെട്രോൾ വിലയിൽ വർധനവ് രേഖപ്പെടുത്തിയപ്പോൾ സൂപ്പർ ഗ്രേഡ് പെട്രോൾ, ഡീസൽ എന്നിവയുടെ നിരക്കുകൾ മാറ്റമില്ലാതെ തുടരും. ഇതനുസരിച്ച് 91-ഒക്ടേൻ പ്രീമിയം പെട്രോൾ ലിറ്ററിന് മേയ് മാസത്തെ 1.90 ഖത്തർ റിയാലിൽ നിന്ന് 2.00 റിയാലായി ഉയരും.

അതേസമയം, 95-ഒക്ടേൻ സൂപ്പർ പെട്രോൾ ലിറ്ററിന് 2.10 റിയാലായും ഡീസൽ ലിറ്ററിന് 2.05 റിയാലായും പഴയ നിരക്കിൽ തന്നെ തുടരും. ദൈനംദിന യാത്രകൾക്കായി പ്രീമിയം പെട്രോൾ അടിക്കുന്ന സ്വകാര്യ വാഹന ഉടമകൾക്കും കുടുംബങ്ങൾക്കും ഈ നേരിയ വിലവർധനവ് പ്രതിമാസ ബജറ്റിൽ ചെറിയ മാറ്റം വരുത്തിയേക്കാം.

അന്താരാഷ്ട്ര വിപണിയിലെ ക്രൂഡോയിൽ വില നിലവാരം വിലയിരുത്തി 2017 സെപ്റ്റംബർ മുതലാണ് ഖത്തർ എനർജി പ്രതിമാസ അടിസ്ഥാനത്തിൽ ഇന്ധനവില നിശ്ചയിച്ചു വരുന്നത്. ഡീസൽ നിരക്കിൽ മാറ്റമില്ലാത്തതിനാൽ രാജ്യത്തെ പൊതുഗതാഗതം, ചരക്കുനീക്കം, സ്കൂൾ-കമ്പനി ബസ് സർവീസുകൾ എന്നിവയുടെ ചെലവുകളെ ഈ വിലവർധന ബാധിക്കില്ലെന്നത് വലിയ ആശ്വാസമാണ്.