അബുദാബി: യുഎഇ വിസ ഓൺ അറൈവൽ (Visa on arrival) വ്യവസ്ഥകൾ കൂടുതൽ വിപുലീകരിച്ച് വിദേശകാര്യ മന്ത്രാലയം.
ഫിലിപ്പീൻസ്, ഇന്തോനേഷ്യ ഉൾപ്പെടെ ആറ് പുതിയ രാജ്യങ്ങളിൽ നിന്നുള്ള പൗരന്മാർക്ക് കൂടി ജൂലൈ 25 മുതൽ യുഎഇയിൽ വിസ ഓൺ അറൈവൽ ലഭ്യമാകുമെന്ന് ഫെഡറൽ അതോറിറ്റി ഫോർ ഐഡൻ്റിറ്റി ആൻഡ് സിറ്റിസൺഷിപ്പും (ICP) വിദേശകാര്യ മന്ത്രാലയവും അറിയിച്ചു.
വിസ നടപടിക്രമങ്ങൾ ലളിതമാക്കുന്നതിലൂടെ രാജ്യാന്തര സന്ദർശകർക്ക് യുഎഇയിലേക്കുള്ള യാത്ര കൂടുതൽ സുഗമമാക്കുകയാണ് ലക്ഷ്യം.
ഏതൊക്കെ രാജ്യങ്ങൾക്കാണ് പുതിയതായി സൗകര്യം?
ഇന്തോനേഷ്യ, വിയറ്റ്നാം, തായ്ലൻഡ്, ഫിലിപ്പീൻസ്, കെനിയ, ദക്ഷിണാഫ്രിക്ക എന്നീ രാജ്യങ്ങളിലെ പൗരന്മാർക്കാണ് പുതിയതായി വിസ ഓൺ അറൈവൽ ആനുകൂല്യം ലഭിക്കുക.
സാധുവായ സാധാരണ പാസ്പോർട്ട് ഉള്ളവർക്കും അവരുടെ കൂടെയെത്തുന്ന കുടുംബാംഗങ്ങൾക്കും നിബന്ധനകൾക്ക് വിധേയമായി ഈ വിസ സൗകര്യം പ്രയോജനപ്പെടുത്താവുന്നതാണ്.
പ്രധാന വ്യവസ്ഥകൾ
പുതുതായി പ്രഖ്യാപിച്ച രാജ്യങ്ങളിൽ നിന്നുള്ളവർക്ക് വിസ ഓൺ അറൈവൽ ലഭിക്കണമെങ്കിൽ ചില കർശന നിബന്ധനകളുണ്ട്.
അമേരിക്ക (US), യുകെ (UK), യൂറോപ്യൻ യൂണിയൻ (EU) രാജ്യങ്ങൾ, സിംഗപ്പൂർ, ജപ്പാൻ, ദക്ഷിണ കൊറിയ, ഓസ്ട്രേലിയ, ന്യൂസിലാൻഡ്, കാനഡ എന്നീ രാജ്യങ്ങളിലേതെങ്കിലും ഒന്നിൽ നിന്നുള്ള സാധുവായ റെസിഡൻസ് പെർമിറ്റ് (Residence permit) ഉള്ളവർക്ക് മാത്രമേ ഈ ആനുകൂല്യം ലഭിക്കൂ എന്ന് ICP വ്യക്തമാക്കി.
വിസ ഫീസും കാലാവധിയും
രണ്ട് തരത്തിലാണ് പുതിയ വിസ ഓൺ അറൈവൽ സന്ദർശകർക്ക് ലഭ്യമാകുക:
- 14 ദിവസത്തെ വിസ: 100 ദിർഹമാണ് ഈ വിസയുടെ നിരക്ക്. രാജ്യത്ത് എത്തിയ ശേഷം ഈ വിസയുടെ കാലാവധി ഒരിക്കൽ കൂടി (14 ദിവസത്തേക്ക്) നീട്ടാൻ സാധിക്കും.
- 60 ദിവസത്തെ വിസ: 250 ദിർഹമാണ് നിരക്ക്. ഇത് ഒറ്റത്തവണ സന്ദർശനത്തിനുള്ള (Single stay) വിസയാണ്. ഇതിന്റെ കാലാവധി പിന്നീട് നീട്ടാൻ സാധിക്കില്ല.
കാലാവധി കഴിഞ്ഞാൽ പിഴ
വിസയുടെ കാലാവധി അവസാനിച്ചാൽ സന്ദർശകർ നിർബന്ധമായും രാജ്യം വിടേണ്ടതാണ്. അല്ലാത്തപക്ഷം, കാലാവധിക്ക് ശേഷം ഓരോ ദിവസത്തിനും 50 ദിർഹം വീതം പിഴ (Overstay fine) ഈടാക്കുന്നതായിരിക്കും.
വിനോദസഞ്ചാരികളെയും ബിസിനസ്സ് നിക്ഷേപകരെയും കൂടുതലായി യുഎഇയിലേക്ക് ആകർഷിക്കുക എന്നതാണ് ഈ പുതിയ പ്രഖ്യാപനത്തിലൂടെ ഗവൺമെൻ്റ് ലക്ഷ്യമിടുന്നത്.
ആഗോള ലക്ഷ്യസ്ഥാനം എന്ന നിലയിലുള്ള യുഎഇയുടെ സ്ഥാനം കൂടുതൽ ഉറപ്പിക്കാൻ ഈ വിസാ പരിഷ്കാരം സഹായിക്കും.
Leave a Comment