ദോഹ: അമേരിക്കയും ഇറാനും തമ്മിൽ ഖത്തറിന്റെ മധ്യസ്ഥതയിൽ പരോക്ഷ സമാധാന ചർച്ചകൾ അന്തിമഘട്ടത്തിലേക്ക് നീങ്ങുന്നതിനിടെ, ഇറാനിൽ വീണ്ടും വ്യോമാക്രമണം നടത്തി അമേരിക്ക. തന്ത്രപ്രധാനമായ ഹോർമുസ് കടലിടുക്കിന് സമീപമുള്ള പ്രധാന തുറമുഖ നഗരമായ ബന്ദർ അബ്ബാസ് ഉൾപ്പെടെ തെക്കൻ ഇറാനിലെ പലയിടങ്ങളിലും യുഎസ് സൈന്യം ശക്തമായ ആക്രമണം നടത്തിയതായി റിപ്പോർട്ടുകൾ വ്യക്തമാക്കുന്നു. ചർച്ചകളിൽ പുരോഗതിയുണ്ടെന്നും 60 ദിവസത്തെ വെടിനിർത്തൽ കരാർ ഉടൻ ഉണ്ടായേക്കുമെന്നുമുള്ള പ്രതീക്ഷകൾ സജീവമായിരിക്കെയാണ്, സമാധാന നീക്കങ്ങൾക്ക് കനത്ത തുരങ്കം വെയ്ക്കുന്ന യുഎസിന്റെ ഈ അപ്രതീക്ഷിത സൈനിക നടപടി.

ആക്രമണത്തിന് പിന്നാലെ ഇറാനെയും സമാധാന നീക്കങ്ങളിൽ ഉൾപ്പെട്ടിരിക്കുന്ന ഒമാനെയും ഒരേസമയം ഭീഷണിപ്പെടുത്തി യുഎസ് പ്രസിഡന്റ് ഡൊണാൾഡ് ട്രംപ് രംഗത്തെത്തി. ഹോർമുസ് കടലിടുക്ക് അന്താരാഷ്ട്ര വ്യോമപാതയാണെന്നും അവിടെ ആരുടെയും നിയന്ത്രണം അനുവദിക്കില്ലെന്നും വ്യക്തമാക്കിയ ട്രംപ്, മറ്റുള്ളവരെപ്പോലെ മര്യാദയ്ക്ക് പെരുമാറിയില്ലെങ്കിൽ ഒമാനെ തകർത്തു കളയുമെന്ന കടുത്ത മുന്നറിയിപ്പാണ് നൽകിയത്. ഇറാൻ തങ്ങളുടെ യുറേനിയം സമ്പുഷ്ടീകരണം പൂർണ്ണമായി ഉപേക്ഷിക്കണമെന്ന വ്യവസ്ഥയ്ക്ക് പിന്നാലെ മിഡിൽ ഈസ്റ്റ് രാജ്യങ്ങൾ ‘എബ്രഹാം ഉടമ്പടി’യുടെ ഭാഗമാകണമെന്ന പുതിയ കർശന നിബന്ധനയും ട്രംപ് മുന്നോട്ടുവെച്ചിട്ടുണ്ട്.

സമാധാന ചർച്ചകളുടെ വാർത്ത പുറത്തുവന്നതോടെ രാജ്യാന്തര വിപണിയിൽ 5 ശതമാനത്തോളം ഇടിഞ്ഞ് 94 ഡോളറിലേക്ക് താഴ്ന്ന ബ്രെന്റ് ക്രൂഡ് ഓയിൽ വില, യുഎസ് വീണ്ടും ആക്രമണം നടത്തിയതോടെ അതിവേഗം മുകളിലേക്ക് ഉയർന്നു. നിലവിൽ ബാരലിന് 96 ഡോളർ നിരക്കിലാണ് എണ്ണവ്യാപാരം നടക്കുന്നത്. പശ്ചിമേഷ്യൻ മേഖല വീണ്ടും കടുത്ത യുദ്ധപ്രതിസന്ധിയിലേക്ക് നീങ്ങുന്നത് നാട്ടിലേക്ക് വരാനിരിക്കുന്ന പ്രവാസി മലയാളികളുടെ യാത്രാ ആസൂത്രണങ്ങളെയും വിമാന ടിക്കറ്റ് നിരക്കുകളെയും വീണ്ടും അനിശ്ചിതത്വത്തിലാക്കുകയാണ്.