കൊതുക് നിങ്ങളെ മാത്രം കടിക്കുന്നോ? കൊതുകുകടിയ്ക്ക് പിന്നിലെ ശാസ്ത്രം

ഒരു കൂട്ടം ആൾക്കാർക്കൊപ്പം ഇരിക്കുമ്പോഴും കൊതുകുകൾ നിങ്ങളെ മാത്രം ലക്ഷ്യം വയ്ക്കുന്നതായി അനുഭവമുണ്ടോ? നിരവധി പേർക്ക് ഇത്തരം അനുഭവങ്ങളുണ്ടാകും. എന്തുകൊണ്ടാണ് കൊതുകുകൾ ചിലരെ മാത്രം ഇത്രയധികം ആകർഷിക്കുന്നത്?

ഇതിന് പിന്നിലെ കാരണങ്ങൾ വെളിപ്പെടുത്തുകയാണ് പുതിയ ശാസ്ത്രീയ പഠനങ്ങൾ. രക്തഗ്രൂപ്പുകളാണ് ഇതിന് കാരണമെന്നായിരുന്നു മുൻകാലങ്ങളിലെ വിശ്വാസം. എന്നാൽ ശരീരഗന്ധം, ചർമ്മത്തിലെ പ്രത്യേക രാസവസ്തുക്കൾ എന്നിവയാണ് ഇതിലെ പ്രധാന വില്ലനെന്നാണ് ഗവേഷകർ വ്യക്തമാക്കുന്നത്.

പ്രധാന കാരണങ്ങൾ ഇവയാണ്:

ശരീരഗന്ധവും കാർബോക്സിലിക് ആസിഡും:

ഓരോ വ്യക്തിയുടെയും ചർമ്മത്തിലുള്ള ബാക്ടീരിയകളുടെ പ്രവർത്തനഫലമായി ഉണ്ടാകുന്ന ഗന്ധമാണ് കൊതുകുകളെ പ്രധാനമായും ആകർഷിക്കുന്നത്. റോക്ക്ഫെല്ലർ യൂണിവേഴ്സിറ്റി (Rockefeller University) നടത്തിയ പഠനപ്രകാരം, ചർമ്മത്തിൽ ഉയർന്ന അളവിൽ ‘കാർബോക്സിലിക് ആസിഡുകൾ’ (Carboxylic acids) ഉള്ളവരെയാണ് കൊതുകുകൾ കൂടുതലായി ലക്ഷ്യം വെക്കുന്നത്. ഈ ആസിഡുകളുടെ സാന്നിധ്യം ഓരോ വ്യക്തിയിലും വ്യത്യാസപ്പെട്ടിരിക്കും.

കാർബൺ ഡയോക്സൈഡ്:

മനുഷ്യർ പുറത്തുവിടുന്ന കാർബൺ ഡയോക്സൈഡ് ദൂരത്തുനിന്നുതന്നെ തിരിച്ചറിയാൻ കൊതുകുകൾക്ക് സാധിക്കും. വ്യായാമം ചെയ്യുന്നവർ, ഗർഭിണികൾ, മുതിർന്നവർ തുടങ്ങിയവർ കൂടുതൽ കാർബൺ ഡയോക്സൈഡ് പുറത്തുവിടുന്നതിനാൽ കൊതുകുകൾ ഇവരെ വേഗത്തിൽ കണ്ടെത്തും. ശ്വാസകോശത്തിൽ നിന്നുള്ള ഈ വാതകത്തിന് പുറമെ ശരീരത്തിന്റെ ചൂടും കൊതുകുകളെ ആകർഷിക്കുന്ന ഘടകങ്ങളാണ്.

വസ്ത്രങ്ങളുടെ നിറം:

കൊതുകുകളെ ആകർഷിക്കുന്നതിൽ നിങ്ങൾ ധരിക്കുന്ന വസ്ത്രങ്ങൾക്കും വലിയ പങ്കുണ്ട്. കറുപ്പ്, നാവി ബ്ലൂ (navy blue), ചുവപ്പ് തുടങ്ങിയ കടും നിറങ്ങളുള്ള വസ്ത്രങ്ങൾ ധരിക്കുന്നത് കൊതുകുകൾക്ക് നിങ്ങളെ വേഗത്തിൽ തിരിച്ചറിയാൻ സഹായിക്കും. അതേസമയം, വെള്ള, പച്ച തുടങ്ങിയ ഇളം നിറങ്ങളോട് കൊതുകുകൾക്ക് ആകർഷണം കുറവാണ്.

പ്രതിരോധിക്കാൻ എന്ത് ചെയ്യണം?

ചർമ്മത്തിലെ സ്വാഭാവിക രാസപ്രക്രിയകൾ മാറ്റാൻ കഴിയില്ലെങ്കിലും കൊതുകുകടി ഒഴിവാക്കാൻ ചില മുൻകരുതലുകൾ സ്വീകരിക്കാം. ഇതിനായി ഇളം നിറത്തിലുള്ള വസ്ത്രങ്ങൾ ധരിക്കാനും, ശരീരം മുഴുവൻ മൂടുന്ന രീതിയിലുള്ള വസ്ത്രങ്ങൾ ഉപയോഗിക്കാനും ശ്രദ്ധിക്കുക. കൂടാതെ ഡിഇഇടി (DEET), പിക്കാരഡിൻ (picaridin) എന്നിവ അടങ്ങിയ മികച്ച കൊതുക് നിവാരണ ലേപനങ്ങൾ ഉപയോഗിക്കുന്നത് കൊതുകുകടി തടയാൻ സഹായിക്കും. ഡെങ്കിപ്പനി പോലുള്ള പകർച്ചവ്യാധികൾ പടരുന്ന സാഹചര്യത്തിൽ ഇത്തരം മുൻകരുതലുകൾ വളരെ പ്രധാനമാണ്.