ഖത്തർ തൊഴിൽ നിയമത്തിൽ നിർണായക മാറ്റങ്ങൾ; വ്യവസ്ഥകളോടെ സമരാവകാശം, വേതന ലംഘനം നടത്തിയാൽ മറ്റ് അനുബന്ധ കമ്പനികൾക്കും പൂട്ടുവീഴും

ദോഹ: ഖത്തറിലെ പ്രവാസി തൊഴിലാളികളെയും തൊഴിലുടമകളെയും നേരിട്ട് ബാധിക്കുന്ന തൊഴിൽ നിയമങ്ങളിൽ നിർണായക ഭേദഗതികൾ വരുത്തി ഖത്തർ ഭരണകൂടം.

ഇന്ത്യക്കാരുൾപ്പെടെ ലക്ഷക്കണക്കിന് വരുന്ന പ്രവാസി തൊഴിലാളികൾക്ക് വലിയ തോതിൽ പ്രായോഗിക ഫലങ്ങൾ നൽകുന്ന 2026-ലെ 9-ാം നമ്പർ നിയമമാണ് (Law No. 9 of 2026) ഇപ്പോൾ പുറത്തുവന്നിരിക്കുന്നത്.

വേതന വിതരണത്തിലെ അനാസ്ഥ, തൊഴിൽ തർക്കങ്ങൾ പരിഹരിക്കൽ, റിക്രൂട്ട്മെന്റ് ഏജൻസികളുടെ നിയന്ത്രണം, ജോലി മാറ്റം എന്നിവയിലെല്ലാം പുതിയ നിയമം വഴി വലിയ മാറ്റങ്ങളാണ് രാജ്യം നടപ്പിലാക്കുന്നത്.

പുതുക്കിയ തൊഴിൽ നിയമപ്രകാരം ചരിത്രത്തിലാദ്യമായി പ്രവാസി തൊഴിലാളികൾക്ക് നിബന്ധനകൾക്ക് വിധേയമായി നിയമപരമായ പണിമുടക്ക് (Legal Strike) നടത്താനുള്ള അവകാശം ഖത്തർ അനുവദിക്കുന്നുണ്ടെന്ന് റിപ്പോർട്ടുകൾ വ്യക്തമാക്കുന്നു.

തൊഴിൽ തർക്കങ്ങൾ ചർച്ചകൾ (Negotiation), അനുരഞ്ജനം (Conciliation), മധ്യസ്ഥത (Mediation) തുടങ്ങിയ ഔദ്യോഗിക മാർഗ്ഗങ്ങളിലൂടെ പരിഹരിക്കാൻ സാധിക്കാത്ത സാഹചര്യത്തിൽ മാത്രമേ പണിമുടക്കിലേക്ക് നീങ്ങാൻ പാടുള്ളൂ.

ഇതിനായി തൊഴിലുടമയ്ക്കും തൊഴിൽ മന്ത്രാലയത്തിനും (Ministry of Labour) മുൻകൂട്ടി രേഖാമൂലം നോട്ടീസ് നൽകിയ ശേഷം തൊഴിലാളികൾക്ക് പരമാവധി ആറ് പ്രവൃത്തിദിവസങ്ങൾ (Working days) വരെ സമരം ചെയ്യാം.

എന്നാൽ ഈ കർശനമായ നടപടിക്രമങ്ങൾ പാലിക്കാതെ നടത്തുന്ന നിയമവിരുദ്ധമായ പണിമുടക്കുകൾക്കെതിരെ കടുത്ത നിയമനടപടികൾ ഉണ്ടാകുമെന്നും അധികൃതർ മുന്നറിയിപ്പ് നൽകുന്നു.

2004-ലെ നിലവിലുള്ള തൊഴിൽ നിയമത്തിലെ ചില പ്രധാന വ്യവസ്ഥകളാണ് പുതിയ ഭേദഗതിയിലൂടെ പരിഷ്കരിച്ചിരിക്കുന്നത്.

ഇതനുസരിച്ച് 100-ഓ അതിൽ കൂടുതലോ ജീവനക്കാരുള്ള എല്ലാ സ്ഥാപനങ്ങളിലും തൊഴിലാളികളുടെയും മാനേജ്‌മെന്റിന്റെയും സംയുക്ത കമ്മിറ്റികൾ (Worker-management joint committees) രൂപീകരിക്കൽ ഇനി മുതൽ നിർബന്ധമാണ്.

സ്ഥാപനങ്ങളിലെ ആഭ്യന്തര ആശയവിനിമയം ശക്തമാക്കാൻ ഇത് സഹായിക്കും.

വേതന സുരക്ഷാ സംവിധാനം (Wage Protection System) ലംഘിക്കുന്ന കമ്പനികൾക്കെതിരെ മന്ത്രാലയത്തിന്റെ സേവനങ്ങൾ തടയുന്നതടക്കമുള്ള കടുത്ത ശിക്ഷാനടപടികൾ ഉണ്ടാകും.

ആവർത്തിച്ച് വേതന നിയമങ്ങൾ ലംഘിക്കുന്ന വ്യവസായികളുടെ മറ്റ് അനുബന്ധ കമ്പനികളുടെയും പ്രവർത്തനങ്ങളെയും ഈ നടപടികൾ ബാധിക്കുമെന്നതാണ് ഏറ്റവും വലിയ പ്രത്യേകത.

തൊഴിൽ തർക്ക പരിഹാര സമിതിക്ക് ഇനി മുതൽ വെർച്വൽ ഹിയറിംഗുകൾ നടത്താനുള്ള പൂർണ്ണ അധികാരം പുതിയ നിയമം നൽകുന്നുണ്ട്.

ഇത് പ്രവാസി തൊഴിലാളികൾക്ക് വലിയ ആശ്വാസമാകും. കേസുകളുടെ നടത്തിപ്പിനായി എല്ലാ തവണയും നേരിട്ട് ഹാജരാകേണ്ടതില്ലാത്തതിനാൽ ജോലി നഷ്ടം, യാത്രാച്ചെലവുകൾ, താമസം സംബന്ധിച്ച ബുദ്ധിമുട്ടുകൾ എന്നിവ നേരിടുന്ന സാധാരണക്കാരായ തൊഴിലാളികൾക്ക് പരാതി നടപടികൾ എളുപ്പത്തിൽ പൂർത്തിയാക്കാൻ സാധിക്കും.

ഇതിനുപുറമെ, ചട്ടങ്ങൾ ലംഘിക്കുന്ന റിക്രൂട്ട്‌മെൻ്റ് ഏജൻസികൾക്ക് 3,000 ഖത്തറി റിയാൽ മുതൽ 25,000 ഖത്തറി റിയാൽ വരെ പിഴ ചുമത്താനും നിയമത്തിൽ വ്യവസ്ഥയുണ്ട്.

സാങ്കേതികവും വൈദഗ്ധ്യവും ആവശ്യമുള്ള തസ്തികകളിൽ ജോലി ചെയ്യുന്നവർക്ക് മന്ത്രാലയം അംഗീകരിച്ച പരിശീലന സർട്ടിഫിക്കറ്റുകളോ പരീക്ഷകളോ നിർബന്ധമാക്കിയേക്കാം.

പുതിയ മാറ്റങ്ങളുടെ പശ്ചാത്തലത്തിൽ ഖത്തറിലെ ഇന്ത്യൻ തൊഴിലാളികളും റിക്രൂട്ട്മെൻ്റ് ഏജൻ്റുമാരും കമ്പനികളും തങ്ങളുടെ തൊഴിൽ കരാറുകൾ, വേതന വ്യവസ്ഥകൾ, നോൺ-കമ്പീറ്റ് ക്ലോസുകൾ എന്നിവ കൃത്യമായി പരിശോധിച്ച് ഉറപ്പുവരുത്തേണ്ടതുണ്ട്